Nulis Geguritan

  Geguritan asal saka tembung lingga gurit sing duweni teges kidung utama tembung, tulisan utawa karangan. Dene nggurit duweni teges ngripa tambang, kidung utawa rerepen. Nulis geguritan minangka nggambarake kaanane ati utawa kaanan kang lagi disandhang (seneng, sedhih lan liyan-liyane).
Tuladha:

Pituture Bapak

nak, aja cedhak kebo gupak
iku weling bapak, nalika sepisanan
aku ketampa ing SMK
bapak, aku ora arep kumpul kebo
wangsulanku bodho
sing dak karepake aja cedhak kanca sing neka-neka
sebab yen pengin apik kancane kudu apik
sapa kanca wong ala bakal ketularan ala
bareng tak gatekna pituture bapak mula prayoga
kuwatir anake cedhak-cedhak babaya narkoba
ora weruh unggah-ungguh lan tata krama.

Pethikan geguritan ing duwur nyritakake pitutur becik marang para putra. Kanthi pangajab supaya anak ngerti lan bisa bedakake barang kang apik lan ala. Sabajure dadi anak/putra kang bekti marang wong tuwa lan ngerti unggah-ungguh tata krama.